തൃപ്പൂണിത്തുറ: തൃപ്പൂണിത്തുറ നഗരസഭാ കൗൺസിലിൽ എൻഡിഎ മുന്നണിയെ ഒഴിവാക്കി ഭരണം പിടിക്കാനുള്ള എൽഡിഎഫ് - യുഡിഎഫ് നീക്കങ്ങൾ മന്ദഗതിയിലായി. തങ്ങളുടെ ബാന്ധവത്തെ ജനങ്ങൾ എങ്ങനെ നോക്കിക്കാണുമെന്ന സംശയത്തിലാണ് ഇരുമുന്നണികളും. യുഡിഎഫ് നേതൃത്വം ഇക്കാര്യത്തിൽ തീരുമാനമെടുക്കുന്നതിന് കെപിസിസിയുടെ നിർദേശങ്ങൾക്കായി കാത്തിരിക്കുകയാണ്.
ചെയർപേഴ്സൺ തെരഞ്ഞെടുപ്പിൽ എൽഡിഎഫ് സ്ഥാനാർഥിയെ നിർത്തുമെന്ന് സിപിഎം നേതാക്കൾ അറിയിച്ചു. അതേസമയം എൻഡിഎ മുന്നണി ചെയർപേഴ്സൺ സ്ഥാനാർഥിയെ നിർത്തി ഭരണം നേടിയെടുക്കാനുള്ള തന്ത്രങ്ങളുമായി മുന്നോട്ടു പോകുകയാണ്.
കൗൺസിലിൽ ഒരു മുന്നണിക്കും കേവല ഭൂരിപക്ഷമില്ലാതെ വന്നതോടെയാണ് നഗരസഭാ ഭരണത്തിന്റെ കാര്യത്തിൽ മുന്നണികൾ സന്ദേഹത്തിലായത്. ആകെയുള്ള 53 സീറ്റുകളിൽ എൻഡിഎ 21, എൽഡിഎഫ് 20, യുഡിഎഫ് 12 എന്നതാണ് കക്ഷിനില.